رئیس‌جمهور افغانستان با امام علی رحمان رئیس‌جمهور کشور تاجیکستان تلفونی صحبت کرد.

به نقل از ارگ، دو طرف در مورد روابط دوجانبه به ویژه تجارت، ترانزیت، تقویت هر چه بیشتر همکاری‌های منطقه‌یی و افزایش همکاری‌ها در امتداد سواحل دریای آمو، گفتگو کردند.

آقای غنی گفت که سرحد افغانستان و تاجیکستان به نقطۀ دوستی و پیشرفت مبدل می‌گردد و نمونۀ دوستی و همکاری خوب میان دو کشور همسایه خواهد بود.

امام علی رحمان رئیس‌جمهور تاجیکستان از پروسۀ صلح به رهبری و مالکیت حکومت افغانستان حمایت قوی کرد و ضمن حمایت از موقف رئیس‌جمهور، وعده داد که تاجیکستان در نشست های منطقه‌‌یی و بین‌المللی، در کنار افغانستان خواهد بود و از موقف حکومت افغانستان حمایت می‌نماید.

آقای رحمان از آقای غنی به خاطر گسترش روابط دوجانبه و چندین جانبه و توسعه همکاری ها، دعوت کرد که به تاجیکستان سفر نماید و رئیس‌جمهور غنی با ابراز امتنان این دعوت را پذیرفت و از امام علی رحمان به خاطر سفر به افغانستان نیز دعوت بعمل آورد.