Friday, 29 March , 2024
امروز : جمعه, ۱۰ حمل , ۱۴۰۳ - 20 رمضان 1445
شناسه خبر : 25396
  پرینتخانه » سیاسی تاریخ انتشار : 18 سپتامبر 2020 - 16:06 |

دیدار محمد حنیف اتمر با رئیس‌جمهور تاجیکستان

دیدار محمد حنیف اتمر با رئیس‌جمهور تاجیکستان

به گزارش خبرگزاری پامیر، وزارت امور خارجه افغانستان امروز نوشت: محمد حنیف اتمر سرپرست وزارت امور خارجهٔ افغانستان، با امام‌‌علی رحمان رئیس جمهوری تاجیکستان دیدار و گفتگو کرد.

این وزارت افزوده است، که در آغاز، رئیس جمهور تاجیکستان آغاز مذاکرات صلح افغانستان را برای وزیر خارجه و مردم افغانستان تبریک گفت.‌ امام‌علی رحمان، ضمن ابراز امیدواری در مورد موفقیت مذاکرات صلح، از پشتیبانی دولت تاجیکستان از روند صلح و موقف اصولی جمهوری اسلامی افغانستان، به وزیر امور خارجهٔ کشور اطمینان داد.

در ادامه این خبرنامه آمده است، که سرپرست وزارت امور خارجه تمنیات نیک جلالتمآب رئیس‌جمهور محمد اشرف غنی و ملت افغانستان را به حضور رییس‌جمهور امام‌علی رحمان پیشکش نمود و از حمایت‌های همیشه‌گی دولت و مردم تاجیکستان ابراز قدردانی کرد. همچنان، آقای اتمر در مورد برنامه رئیس جمهوری اسلامی افغانستان که قرار است در آیندهٔ نزدیک به تاجیکستان سفر کند، به رئيس جمهور تاجیکستان معلومات داد.

وزارت خارجه افغانستان نوشته است، که رییس‌جمهور امام علی رحمان ضمن تأکید بر توسعهٔ روابط دو کشور در عرصه‌های اقتصادی، تجارتی و علمی-فرهنگی، همکاری با افغانستان را از اولویت‌های سیاست خارجی جمهوری تاجیکستان شمرد. با اشاره به تقویت جایگاه افغانستان در منطقه، رییس‌جمهور رحمان تأیید کرد که تعقیب پروژه‌های زیربنایی از جمله انتقال انرژی برق عامل جذب افغانستان در روند همکاری‌های منطقه‌یی می‌باشد. آقای رحمان همچنان گفت که ملت تاجیکستان همیشه از موقف دولت جمهوری اسلامی افغانستان در تأمین امنیت و صلح پایدار پشتیبانی نموده و در راستای حل مشکلات سعی و تلاش کرده است.

در پایان این خبرنامه آمده است، که در ادامه، دو جانب در پیوند به تطبیق پروژه‌های زیربنایی، توسعهٔ تجارت و ترانزیت، انتقال انرژی، مبارزه با تروریزم و تندروی، مهار جرایم سازمان‌یافته، تحکیم همکاری‌های سرحدی، گسترش دادوستد فرهنگی و آموزش کادرهای مسلکی افغانستان صحبت‌های مفصل داشتند. آقای اتمر با تأکید بر پیوندهای عمیق تاریخی و فرهنگی میان دو کشور، خواهان گسترش روابط دوجانبه به سطح همکاری‌های راهبردی شد.

یادآوری می کنیم، که وزیر امور خارجه افغانستان دو روز پیش برای گفت و گو با مقام های تاجیکستانی به این کشور سفر کرده بود.

به اشتراک بگذارید
تعداد دیدگاه : 0
  • دیدگاه های ارسال شده توسط شما، پس از تایید توسط تیم مدیریت در وب منتشر خواهد شد.
  • پیام هایی که حاوی تهمت یا دروغ باشد منتشر نخواهد شد.
  • پیام هایی که به غیر از زبان فارسی یا غیر مرتبط باشد منتشر نخواهد شد.