زلمی خلیلزاد نمایندۀ ویژۀ امریکا برای صلح افغانستان با رییس جمهور تاجیکستان در مورد صلح افغانستان گفت وگو کرده است.

سفارت امریکا در تاجیکستان اعلام کرده است که این دیدار روز گذشته(سه‌شنبه، چهاردهم ثور) در شهر دوشنبه پایتخت تاجیکستان صورت گرفته است.
روند صلح افغانستان و تقویت اجماع منطقه‌یی برای موفقیت این روند محور بحث بین دو جانب بوده است.

به نقل از خبرنامۀ این سفارت، رییس جمهور تاجیکستان اظهار داشته است که دوشنبه از تمام ظرفیت خود برای حل مسئلۀ افغانستان استفاده خواهد کرد.

همزمان خلیلزاد نیز نقش تاجیکستان را در موفقیت روند صلح افغانستان واتصال منطقه‌یی برای انکشاف اقتصادی منطقه مهم توصیف کرده و از این کشور خواسته است که از ظرفیت‌های خود در روند صلح افغانستان کار بگیرد.

گفتنی است که خلیلزاد اوایل دو روز پیش، پس از دیدار با همتایان روس، چین و پاکستانی‌اش در دوحه، وارد کابل شده و با سران دولت وسیاسیون افغانستان دیدار کرده بود.

خلیلزاد درجریان این سفر اعلام کرد که واشنگتن مخالف هرگونه تلاش طالبان برای کسب قدرت از راه زور درافغانستان خواهد بود.