نماینده ویژه‌ی رییس‌جمهور اوزبیکستان در دیدار با مقام‌های ارشد حکومت افغانستان، ازمیزبانی نشست سه جانبه‌ی رهبران افغانستان، اوزبیکستان و پاکستان اعلان آمادگی کرد.

به گزارش آژانس خبری صدای پامیر، وزارت خارجه با نشر خبرنامه‌یی گفته که محمدحنیف اتمر با عصمت الله ایرگاشیف نماینده‌ ویژه‌ی رییس‌جمهور اوزبکستان دیدار و گفت‌وگو کرده است.

در خبرنامه آمده است که آقای اتمر از کمک ۱۰۰۰ بالُن اکسیجن دولت اوزبیکستان تشکری کرده و در عین حال، دو طرف پیرامون مبارزه با تروریزم، آخرین تحولات در روند صلح و تقویت همکاری‌های دو جانبه نیز تاکید ورزیدند.

آقای اتمر در این دیدار، حمایت کشورهای منطقه و به ویژه نقش اوزبیکستان را در روند صلح افغانستان مهم خواند.

از سوی هم، نماینده ویژه‌ی رییس‌جمهوری اوزبیکستان از تداوم همکاری‌های کشورش در خصوص مبارزه با تروریزم و حمایت از روند صلح اطمینان داده و در خصوص آمادگی‌های اوزبیکستان برای برگزاری نشست سه‌جانبه‌ی رهبران افغانستان، اوزبیکستان و پاکستان اعلام آمادگی کرد.

براساس معلومات وزارت خارجه، نشست سه‌جانبه سران افغانستان، اوزبیکستان و پاکستان در ماه آینده‌ی میلادی در تاشکند برگزار خواهد شد.

هدف از برگزاری این نشست، چگونگی روند صلح افغانستان، تقویت همکاری‌ها و اتصال منطقه‌یی خواهد بود.

آژانس خبری صدای پامیر- کابل