هم‌زمان با تشدید جنگ در شمال و شمال‌شرق افغانستان، دولت تاجیکستان تصمیم گرفته که ۲۰ هزار نیروی امنیتی خود را در مرز با افغانستان مستقر کند.

به گزارش آژانس خبری صدای پامیر، امام‌علی رحمان رییس‌جمهوری تاجیکستان، روز دوشنبه(۱۴ سرطان) نشست شورای امنیت ملی تاجیکستان را برگزار کرد.

در این نشست، در مورد تقویت حفاظت از مرز و اعزام نیروهای اضافی به مناطق ضروری در مرز با افغانستان تصمیم گرفته است.

رییس‌جمهوری تاجیکستان در نشست شورای امنیت ملی به وزیردفاع این کشور دستور داده که ۲۰ هزار نیروی اضافی را به نقاط مرزی با افغانستان مستقر کند.

این تصمیم دولت تاجیکستان در حالی اتخاذ می‌شود که گروه طالبان در هفته‌های اخیر، در ولایت‌های شمال و شمال‌شرقی کشور پیشرفتی داشته‌اند و پیش‌روی طالبان منجر به نگرانی دولت تاجیکستان شده است.

افزون براین، در یک ماه اخیر، شماری از نیروهای امنیتی برای حفاظت و مصونیت جان‌شان از حملات طالبان، به تاجیکستان عقب‌نشینی کردند.

آژانس خبری صدای پامیر- کابل