Friday, 29 March , 2024
امروز : جمعه, ۱۰ حمل , ۱۴۰۳ - 20 رمضان 1445
شناسه خبر : 30647
  پرینتخانه » اخبار افغانستان, سیاسی تاریخ انتشار : 04 جولای 2021 - 21:34 |

گفت‌وگوی تلیفونی رییسان جمهور افغانستان و تاجیکستان

گفت‌وگوی تلیفونی رییسان جمهور افغانستان و تاجیکستان

محمداشرف غنی، رییس‌جمهوری افغانستان در تماس تلیفونی با امام‌علی رحمان، رییس‌جمهور تاجیکستان در مورد آن‌عده شهروندان افغان که از اثر خشونت‌های طالبان در مناطق مرزی به به این کشور پناه برده‌اند، صحبت کرده است.

به گزارش آژانس خبری صدای پامیر، ارگ ریاست‌جمهوری با نشر خبرنامه‌یی گفته که تماس تلیفونی میان رییسان جمهور افغانستان و تاجیکستان عصر امروز یک‌شنبه(۱۳سرطان) انجام شده است.

در خبرنامه‌ی ارگ آمده است:«در این مکالمه تیلفونی، هر دو جانب در مورد آن عده شهروندان افغان که در اثر ظلم و خشونت طالبان در مناطق مرزی با تاجیکستان به آن کشور پناه برده‌اند، صحبت نمودند.»

طبق این خبرنامه، رییس‌جمهوری تاجیکستان از وضعیت پیش‌آمده در افغانستان ابراز نگرانی کرد و در مقابل، رییس‌جمهور غنی نیز ضمن قدردانی از حسن‌نیت بشردوستانه‌ی کشور تاجیکستان، افزود که دولت جمهوری اسلامی افغانستان در قبال شهروندان خود مسوول است و به زودترین فرصت، اقدامات لازم و عاجل را به‌منظور رسیدگی به آن‌ها انجام خواهد داد.

این تماس تلیفونی درحالی برقرار می‌شود که در هفته‌های اخیر، شماری از شهروندان در شمال کشور که هم‌مرز با تاجیکستان است، به مناطق مرزی این کشور پناه برده‌اند.

پیش از این، مقام‌های تاجیکستانی گفته بودند که شماری از نیروهای امنیتی افغان در شیرخان بندر ولایت کندز، جهت مصون ماندن از حملات طالبان وارد خاک این کشور شده‌اند.

آژانس خبری صدای پامیر- کابل

به اشتراک بگذارید
تعداد دیدگاه : 0
  • دیدگاه های ارسال شده توسط شما، پس از تایید توسط تیم مدیریت در وب منتشر خواهد شد.
  • پیام هایی که حاوی تهمت یا دروغ باشد منتشر نخواهد شد.
  • پیام هایی که به غیر از زبان فارسی یا غیر مرتبط باشد منتشر نخواهد شد.