به گزارش آژانس خبری صدای پامیر، به نقل از رسانه‌های تاجیکستان، ولادیمیر پوتین، رئیس‌جمهوری روسیه، که به منظور شرکت در نشست «آسیای مرکزی–روسیه» و اجلاس سران کشورهای مستقل همسود (CIS) به پایتخت تاجیکستان، دوشنبه، سفر کرده بود، امروز (پنج‌شنبه ۱۷ میزان) با امامعلی رحمان، رئیس‌جمهور تاجیکستان، دیدار کرد.
پوتین در این دیدار تاجیکستان را «متحدی قابل اعتماد» روسیه خواند و گفت که روابط میان دو کشور در تمامی زمینه‌ها، از جمله همکاری‌های دفاعی و امنیتی، در حال گسترش است.
در مقابل، امامعلی رحمان نیز از روند رو‌به‌رشد همکاری‌ها در حوزه‌های تجاری، اقتصادی، فرهنگی، بشردوستانه و امنیتی ابراز رضایت کرد و افزود که گردش مالی تجاری میان دو کشور در حال افزایش است. او تأکید کرد: «روسیه شریک اصلی سیاسی و اقتصادی تاجیکستان است و نتایج مذاکرات اخیر میان هیأت‌های دو کشور، به روابط دوشنبه و مسکو رونق تازه‌ای خواهد بخشید.»
نشست «آسیای مرکزی–روسیه» و اجلاس CIS با حضور رهبران کشورهای تاجیکستان، ازبکستان، قزاقستان، قرقیزستان، ترکمنستان و روسیه در کاخ ملت ریاست‌جمهوری تاجیکستان برگزار شده است.
هدف از این نشست، بررسی همکاری‌های چندجانبه میان روسیه و کشورهای آسیای مرکزی در زمینه‌های اقتصادی، تجاری، فرهنگی و امنیتی عنوان شده است. شرکت‌کنندگان همچنین درباره هماهنگی عملیات‌های مشترک در مبارزه با تروریسم، افراط‌گرایی، قاچاق مواد مخدر و سایر تهدیدات فرا مرزی گفت‌وگو می‌کنند.
قرار است در پایان نشست، بیانیهٔ مشترک و برنامهٔ اقدام مشترک میان کشورهای عضو صادر شود. هم‌زمان، وزارت کشور تاجیکستان تدابیر امنیتی شدیدی را برای برگزاری این رویداد در پایتخت اتخاذ کرده است.
دیدار پوتین و رحمان در شرایطی برگزار می‌شود که مسکو در پی تقویت نفوذ خود در آسیای مرکزی و مقابله با نفوذ فزایندهٔ چین و غرب در این منطقه است. تاجیکستان نیز با توجه به وابستگی اقتصادی و نیروی کار مهاجر به روسیه، تلاش دارد روابط دوجانبه را در سطحی راهبردی حفظ کند.
