د پامیر غږ خبري آژانس د راپور له مخې، په کابل کې د روسیې سفیر د مې ۹مې (د بریا ورځې) د رارسېدو په درشل کې ویلي چې دا ورځ د روسیې د خلکو لپاره له تر ټولو مهمو تاریخي مناسبتونو څخه ده؛ هغه ورځ چې پکې نازي جرمني په ۱۹۴۵ کال کې تسلیم شو او په اروپا کې دویمه نړیواله جګړه پای ته ورسېده.
د هغه په وینا، دا ورځ د میلیونونو هغو انسانانو د قربانۍ، زړورتیا او اتلولۍ نښه ده چې د نازیزم پر وړاندې ودرېدل او په پای کې یې د اروپا د ازادۍ او نړیوالې سولې لپاره زمینه برابره کړه.
ژیرنوف زیاته کړه چې د روسیې خلک دا ورځ د ملي جشن په توګه لمانځي او د قربانیانو او پخوانیو سرتېرو یاد په درناوي سره تازه کوي. هغه ټینګار وکړ چې د جګړې پر مهال، شوروي اتحاد د نازي ځواکونو په ماتولو کې بنسټیز رول لوبولی او نږدې ټولې کورنۍ په دې هېواد کې د جګړې له اغېزو اغېزمنې شوې دي.
هغه همدارنګه د هغه څه په اړه چې د دویمې نړیوالې جګړې د تاریخ «تحریف» یې وباله، خبرداری ورکړ او ویې ویل چې د شوروي رول کم ارزښته کول یا د نازیزم ستاینه د منلو وړ نه ده.
په دوام کې، د روسیې سفیر اوسني وضعیت ته هم اشاره وکړه او ویې ویل چې هېواد یې یو ځل بیا له جګړې سره مخ دی او روسي ځواکونه د «ځانګړو پوځي عملیاتو» په چوکاټ کې د هغو کسانو پر وړاندې جګړه کوي چې هغه یې نئونازیان بولي او د دونباس سیمې له اوسېدونکو دفاع کوي.
