به گزارش آژانس خبری پامیر، برخی پناهجویان افغانستان با ابراز نگرانی از وضعیت زندگی در تاجیکستان اظهار داشتند نیروهای امنیتی این کشور با انجام عملیات‌های گسترده، پناهجویان افغان را در خانه‌هایشان دستگیر و به افغانستان بازمی‌گردانند.
این افراد که اغلب در شهرک وحدت، حومه شهر «دوشنبه» پایتخت تاجیکستان سکونت دارند، می‌گویند از هراس دستگیری، مجبور شده‌اند در خانه‌های خود قرنطینه شوند.
دفتر کمیساری عالی سازمان ملل در امور پناهجویان پیش از این نسبت به افزایش موارد اخراج اجباری پناهجویان افغانستان از تاجیکستان ابراز نگرانی کرده بود. با این حال، مقامات تاجیکستان مدعی شده‌اند تنها افراد فاقد مدارک اقامتی را اخراج می‌کنند.
نصرت‌الله محمدزاده، سخنگوی وزارت داخله تاجیکستان، گفته بود کشورش تنها افرادی را اخراج می‌کند که قوانین مهاجرتی را رعایت نکرده‌اند.
اقدامات اخیر دولت تاجیکستان در بازگرداندن اجباری پناهجویان افغانستان، نه تنها مغایر با اصول حقوق بشری و بین المللی است، بلکه در شرایطی صورت می‌گیرد که پناهجویان افغانستان در این کشور با مشکلات عدیده‌ای روبرو بوده و شرایط زندگی آن‌ها همواره مورد انتقاد بوده است.
آژانس خبری پامیر
