به گزارش آژانس خبری صدای پامیر، کمیته دولتی امنیت ملی تاجیکستان اعلام کرده است که در نتیجه یک درگیری مسلحانه در مرز این کشور با افغانستان، پنج نفر به‌شمول دو تن از نیروهای گارد مرزی تاجیکستان جان باخته‌اند.
بر اساس اعلام این نهاد، این رویداد حوالی ساعت ۱۱:۳۰ شب سه‌شنبه، ۲ جدی رخ داده است. کمیته امنیت ملی تاجیکستان گفته است که افراد مهاجم، که از آنان به عنوان «هراس‌افکن» یاد شده، از اجرای دستور تسلیم شدن سر باز زده و با نیروهای مرزی وارد درگیری مسلحانه شده‌اند.
در بیانیه‌ای که خبرگزاری دولتی «خاور» تاجیکستان آن را منتشر کرده، آمده است که در جریان عملیات نظامی نیروهای مرزی، هر سه فرد مهاجم کشته شده‌اند.
گارد مرزی کمیته دولتی امنیت ملی تاجیکستان در واکنش به این رویداد، ابراز امیدواری کرده است که طالبان تدابیر جدی‌تری برای تأمین امنیت مرز مشترک با تاجیکستان روی دست بگیرند تا از تکرار چنین حوادثی جلوگیری شود.
مقام‌های تاجیکستان تأکید کرده‌اند که در حال حاضر وضعیت امنیتی در مرز تاجیکستان و افغانستان آرام است و نیروهای مرزی کنترول کامل اوضاع را در دست دارند.
در همین حال، سازمان پیمان امنیت جمعی (CSTO) پیش‌تر گزارش‌های منتشرشده در برخی رسانه‌ها مبنی بر درخواست تاجیکستان برای دریافت کمک در پی حمله‌های مسلحانه از خاک افغانستان را رد کرده است.
این سازمان اعلام کرده است که شهر دوشنبه در ارتباط با رویدادهای ۲۶ و ۳۰ نوامبر، هیچ‌گونه درخواستی برای کمک نظامی یا امنیتی از سوی تاجیکستان دریافت نکرده است.
