به گزارش آژانس خبری پامیر، برخی خبرنگاران در فضای مجازی به نقل از منابعی اعلام کردند دولت تاجیکستان با پذیرش یک دیپلمات طالبان در سفارت افغانستان در دوشنبه موافقت کرده است.
این منابع همچنین گفته‌اند: وزارت خارجه تاجیکستان به «ظاهر اغبر» سفیر افغانستان نیز تفهیم کرده تا امور سفارت را با دیپلمات طالبان یکجا به پیش ببرد.
بشیر احمد قاسانی از خبرنگاران افغانستان نیز اظهار داشت دولت تاجیکستان یا طالبان تاکنون دراین‌باره اظهار نظر نکرده است.
گفتنی است سفارت افغانستان در دوشنبه پیش از این از پذیرفتن مدیریت کابل برای این نمایندگی سیاسی خودداری کرده است و امور خود را در هماهنگی با «امرالله صالح» معاون اول رئیس‌جمهور سابق پیش می‌برد.
ذبیح‌الله مجاهد سخنگوی حکومت طالبان پیش از این در واکنش به نگرانی‌های امنیتی مقامات تاجیکستان از خاک افغانستان گفته بود این نگرانی‌ها بی‌اساس است و از خاک این کشور علیه دیگران تهدیدی صورت نخواهد گرفت.
آژانس خبری پامیر
