به گزارش آژانس خبری صدای پامیر، شب گذشته ۱۱۰ مهاجر افغان از شهر وحدت، در حومه دوشنبه، به ولایت قندوز افغانستان اخراج شده‌اند.
مقام‌های تاجیکستان تاکنون درباره اخراج مهاجران از شهر وحدت و ناحیه جبار رسولوف در شمال این کشور واکنشی نشان نداده‌اند. به گفته منابع، مقام‌های تاجیکستانی معمولاً در چنین مواردی جزئیاتی در اختیار رسانه‌ها قرار نمی‌دهند.
موج تازه اخراج مهاجران افغان از تاجیکستان پس از آن شدت گرفته که اخیراً یک زن شهروند تاجیکستان در شمال این کشور به قتل رسید و رسانه‌های محلی از فرد مظنون به عنوان «مهاجر افغان» نام بردند. شماری از مهاجران افغان نگران‌اند که این رویداد زمینه را برای افزایش فشارها و اخراج گسترده‌تر پناهندگان فراهم کرده باشد.
در همین حال، نامه‌ای از سوی کمیته مهاجران افغان مقیم تاجیکستان به دست رسانه‌ها رسیده که در آن از مهاجران خواسته شده رفتار مسئولانه‌تری در جامعه میزبان داشته باشند. در این نامه آمده است که برخی رفتارهای نادرست باعث افزایش بازداشت‌ها و اخراج‌های اجباری شده و پیامد آن متوجه تمام جامعه مهاجران می‌شود.
در بخشی از این نامه تأکید شده که خانواده‌های مهاجر باید به آموزش و تربیه فرزندان خود توجه جدی داشته باشند و از برنامه‌های آموزشی و آگاهی‌دهی نهادهای ملی و بین‌المللی استفاده کنند تا از بروز مشکلات ناشی از ناآگاهی جلوگیری شود.
براساس اطلاعات منتشرشده، تا پیش از اخراج‌های اخیر، ۵۱ خانواده مهاجر افغان در ولایت سغد تاجیکستان زندگی می‌کردند که بیشتر آنان در ناحیه جبار رسولوف ساکن بودند. گفته می‌شود اکنون تنها ۸ خانواده افغان در شمال تاجیکستان باقی مانده‌اند که یا دارای حق اقامت قانونی هستند و یا با شهروندان تاجیکستان ازدواج کرده‌اند.
در میان اخراج‌شدگان، اعضای خانواده فرد مظنون به قتل یک زن تاجیکستانی نیز حضور داشته‌اند.
براساس آمارهای موجود، شمار مهاجران افغان در تاجیکستان بین ۸ تا ۹ هزار نفر تخمین زده می‌شود. هر سال شماری از این مهاجران در چارچوب برنامه‌های حمایتی و با همکاری سازمان‌های بین‌المللی به کشورهای دیگر، از جمله کانادا منتقل می‌شوند.
در همین راستا، روز گذشته چهارشنبه ۱۶ ثور، حدود ۵۰ پناهجوی افغان با همکاری سازمان بین‌المللی مهاجرت و حمایت مالی بستگان‌شان از تاجیکستان به کانادا انتقال یافته‌اند.
