به گزارش خبرنگار آژانس خبری صدای پامیر در ولایت تخار، ریاست صحت عامه ولایت تخار می‌گوید که سازمان جهانی صحت ۲۹۹ کارتن داروی ضروری را به شفاخانه ولایتی تخار کمک کرده است.
مولوی شیخ میر صدام، رئیس صحت عامه این ولایت، با ابراز قدردانی از همکاری‌ها و کمک‌های دوامدار این سازمان گفته است که چنین کمک‌ها در تقویت خدمات صحی، رسیدگی به مشکلات بیماران و رفع نیازمندی‌های شفاخانه نقش مهم و ارزنده دارد.
او افزوده است که این محموله دارویی بخش بزرگی از نیازهای شفاخانه را مرفوع ساخته، روند تداوی مریضان را سرعت می‌بخشد و زمینه ارائه خدمات صحی معیاری‌تر را فراهم می‌سازد.
همچنان وی از نهادهای همکار خواسته است تا کمک‌های خود در بخش صحت را به‌گونه دوامدار ادامه دهند تا خدمات درمانی در ولایت تخار بیشتر تقویت گردد.
کمک‌های دارویی نهادهای بین‌المللی مانند سازمان جهانی صحت، در ولایات دوردست افغانستان به‌ویژه تخار، نقش کلیدی در حفظ دوام خدمات صحی دارد. با این حال، وابستگی دوامدار به کمک‌های خارجی همچنان یکی از چالش‌های اساسی نظام صحی کشور باقی مانده است.
