به گزارش آژانس خبری صدای پامیر ، یک مرد افغان-کانادایی از دولت کانادا خواستار تسریع روند حمایت از پناهنده‌گی مادرش شده است که پس از ضرب و شتم توسط طالبان، افغانستان را ترک‌کرده و اکنون در تاجیکستان پناه گرفته است.
شبکه خبری سی‌بی‌سی روز یک‌شنبه، ۱۰ آگست، گزارش داده نورالله حکیمی، ساکن اتاوا، گفت که مادر ۵۷ ساله اش در خطر است زیرا دولت تاجیکستان دستور اخراج پناهنده‌گان افغان را صادر کرده است.
او افزود که مادرش از نظر صحی در وضعیت خوبی است اما از نظر امنیتی در معرض تهدید قرار دارد.
وزارت مهاجرت، پناهنده‌گان و شهروندی کانادا در بیانیه‌ای اعلام کرد که نگران اخراج پناهنده‌گان افغان توسط مقامات تاجیکستان است .
گفته می‌شود این نهاد با همکاری سازمان بین‌المللی مهاجرت و کمیساریای عالی پناهندگان سازمان ملل، در حال مذاکره با مقامات تاجیکستان است تا از پناهنده‌گانی که قرار است در کانادا اسکان یابند، حفاظت و حمایت کند.
