به گزارش خبرگزاری پامیر، در یورش جنگجویان گروه طالبان بر ولسوالی درایم ولایت بدخشان یک فرمانده خیزش مردمی این ولسوالی جان باخت.

ثناءالله روحانی، سخنگوی فرماندهی پولیس بدخشان گفت، که تروریستان طالب، حوالی ساعت ۱۲:۰۰ پنچ‌شنبه شب (۲۰ سنبله)، بر خانه‌ی فرمانده‌ی خیزش مردمی و شهردار ولسوالی درایم این ولایت، حمله کردند.

او تصریح کرد، که در نتیجه‌ی این رویداد «عبدالحی» فرمانده‌ی خیزش مردمی این ولسوالی کشته شده و گل‌آغا، شهردار ولسوالی درایم و یک غیرنظامی دیگر زخمی شده‌اند.

سخنگوی پولیس بدخشان افزود، که تروریستان طالب پس از درگیری کوتاه و رسیدن نیروهای کمکی، عقب نشینی کردند.

یادآوری می کنیم، که ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت‌ گروه‌های تروریستی است.

گفته می‌شود، که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت می‌شوند و دست به اقدامات تروریستی می‌زنند.