رسانه‌های تاجیکستانی به نقل از نهادهای دولتی تاجیکستان خبر داده‌اند که یک هزار و ۳۷ نیروی امنیتی افغان در پی حملات طالبان از شش ولسوالی ولایت بدخشان به تاجیکستان عقب‌نشینی کرده‌اند.

به گزارش آژانس خبری صدای پامیر، مرکز مطبوعات نیروهای مرزبانی کمیته‌ی دولتی امنیت ملی تاجیکستان گفته که به‌دنبال حمله‌ی طالبان به ولسوالی‌های خواهان، شکی، نسی، ماه‌می، شغنان و اشکاشم که ۹۱۰ کیلومتر مرز مشترک با این کشور دارد، یک هزار و ۳۷ نیروی امنیتی افغان از مرز عبور کرده‌اند.

خبرگزاری خاور تاجیکستان، صبح امروز دوشنبه(۱۴ سرطان) گزارش داده که ولسوالی‌های ذکرشده به دست طالبان افتاده است اما منابع محلی افغان گفته‌اند که ولسوالی ماه‌می و دیگر ولسوالی‌های درواز به دست طالبان سقوط نکرده است.

منابع محلی گفته‌اند که بسیاری از ولسوالی‌های بدخشان بدون درگیری به طالبان واگذار شده و نیز، جنگ‌جویان این گروه برخی از تاسیسات دولتی و نهادهای خیریه را با خود برده‌اند.

هم‌زمان با تشدید این خشونت‌ها، رییسان جمهور افغانستان و تاجیکستان شام روز گذشته صحبت تلیفونی کردند و دو طرف در خصوص آن عده از شهروندانی‌که از مناطق مرزی به خاک تاجیکستان وارد شده، گفت‌وگو کردند.

آژانس خبری صدای پامیر- کابل